جێگری پارێزگار: شوێنگرتنی گەشەی کوردستان تەنیا لە مەجلیسێکی بەهێزدا مومکینە

بە پێی هەواڵی کوردپرێس بە گێڕانەوە لە بنکەی ڕاگەیاندنەکانی پارێزگاریی کوردستان عەلیڕەزا ئاشناگەر لە کۆبوونەوەی چالاکانی سیاسی لەگەڵ نوێنەری وەلی فەقێ لە کوردستان، زیادی کرد: نموونەیەک بۆ پێویستی مەجلیسێکی بەهێز، ناوچەی ئازادی بانە و مەریوان بوو کە سەرەڕای هەموو هەوڵەکانی دەوڵەت لەو بوارەدا نوێنەرانی پارێزگا لە مەجلیس نەیانتوانی کارێکی ئەوتۆ ئەنجام بدەن بۆ پەسەندبوونی پرۆژەیاساکە.

ناوبراو درێژەی دا: ویستی خودای گەورەی لەسەر بێت لە خولی داهاتوودا مەجلیسێکی بەهێزتر، هەماهەنگتر و بە هێزی لۆبیگەری زۆرتر دەتوانێت ئەم کێشەیە چارەسەر بکات.

بە وتەی ناوبراو پێویستە هەموو بەش و لایەنەکان هەوڵ بدەن بۆ هاندانی خەڵکی بۆ بەشداری لە هەڵبژاردن تا ئەوانەش کە هێشتا بۆ بەشداری کردن بڕیاریان نەداوە بێنە پای سندووقەکانی دەنگدان.

ئاشناگەر بە ئاماژە بەوەی کە لە سەرەکیترین و گرینگترین هێماکانی بەشداری خەڵک، هەڵبژاردنە وتی: هەڵبژاردن سەرەڕای نواندنی هێزی پارت و لایەنە جۆراوجۆرەکان، هۆکاری بەرزبوونەوەی دەسەڵاتی نیزام و هەڤگری و هاودڵی وڵاتیشە.

ناوبراو لە بەشێکی دیکەی وتەکانیدا ڕایگەیاند کە تا ئێستا ٩٤ کەس لە گۆڕەپانی هەڵبژاردندا ماونەتەوە و زیادی کرد: کشانەوەکان بەردەوامن و ئەم ئامارە ڕەنگە تا سبەینێ بگۆڕدرێت.

وتیشی: لەو ٩٤ نەفەرە، ٣٨ بەربژار لە بازگەی سنە، کامیاران و دیواندەرە، ١٨ بەربژار لە بیجار، ١١ نەفەر لە سەقز و بانە، ٦ نەفەر لە قوروە و دێولان و ١٩ بەربژاریش لە مەریوان و سەوڵاوادان.

جێگری سیاسی، ئەمنییەتی و کۆمەڵایەتی پارێزگار هەروەها دەریخست: ١١٩٧ بنکەی دەنگدان لە تێکڕای پارێزگا دادەمەزرێن کە ٥٩٥ بنکەی نەگۆڕ و ٦٠٢ بنکەشیان گەڕۆکن.

ئاشناگەر درێژەی دا: لە تێکڕای بنکە دەنگدانەکان ٧١٥ بنکە گوندی و ٤٨٢ بنکەیش شارین.

ناوبراو وتی: ٥ هەزار و ٢٦٥ نەفەر لە هێزە ئینتیزامییەکان ئەرکی پاراستنی بنکەکانی دەنگدان لە پارێزگایان لە ئەستۆیە.

وتیشی: کۆی گشتی ئەوانەی کە دەتوانن دەنگ بدەن لە پارێزگادا یەک ملیۆن و ١٦١ هەزار و ٥٣٧ نەفەرە.