Îran: Em wekî welatekî gelsalar rêzê ji biryara gelê Berîtanyayê re digirin

Wezareta Îranê ya karên derve derbarê encama giştpirsiya li Berîtanyayê ya derheqê cidabûna wî welatî ji Yekîtiya Ewrûpayê daxuyaniyek weşand.

Li gor rapora Kurdpress`ê ji zarê malpera ragihandinê ya dewletê, di daxuyaniyê de wiha hatiye gotin: Komara Îslamî ya Îranê wekî welatekî gelsalar rêzê ji biryara gelê Berîtanyayê ya derheqê cidabûna wî welatî ji YE`yê re digire û dê vê biryayê wekî xwesteka pirraniya xelkê wî welatî di rêzik, pirensîb û pîvanên pêwendiyên xwe yên derve de berçav bigire.

Di daxuyaniyê de herwiha hatiye gotin: Komara Îslamî ya Îranê hertim li pey berfirehkirina pêwendî û têkiliyên xwe yên li gel welatên ewrûpî li ser bingeha rêzgirtina dualî û destnewerdana di karûbarên navxweyî de bûye û derketina Berîtanyayê ji YE`yê jî wê ti guherînekê di nêrîn û siyasetên me li ser wî welatî de çê neke.

Roja pêncşemiyê li Berîtanyayê li ser cidahiya wî welatî ji Yekîtiya Ewropayê giştpirsî hat lidarxistin û zêdetir ji sedî 50 yê xelkê wî welatî dengê erê bi kar anîn.