لاوی سەردەشتی ڕیکۆردی تەک چەرخ بە باسکێڵی جیهانی شکاند/ بەرپرسانی ئازەربایجانی ڕۆژئاوا یارمەتییان نەدا

ئاوات ڕەشیدی خاوەنی ڕێکۆردی تەک چەرخ بە باسکێڵ لە ئیران، 21ی پووشپەڕ پاش شکاندنی ڕێکۆردی جیهانی تەک چەرخ بە باسکێڵ لە لێدوانێک بۆ هەواڵنێری کوردپرێس وتی: ئەمڕۆ بە یارمەتی خودای گەورە توانیم ماوەی ٣ کاتژمێر و ١٥ خولەک مەودای ٤٥ کیلۆمەتر و ٢٢٠ مەتر تێپەڕ بکەم و ڕێکۆردی جیهان بشکێنم.

ناوبراو زیادی کرد: ڕێکۆردی تەک چەرخ لە جیهان بە مەودای ٤٥ کیلۆمەتر لەدەستی kurt osbuی ئەمەریکی بووە کە لە ١٠ کاتژمێر و ٤٠ خولەک تۆمار کراوە و لە ڕوانگەی کاتیشەوە ئەم ڕێکۆردە ٧ کاتژمێر و ٢٥ خولەک باشتر بووەتەوە.

ڕەشیدی سەبارەت بە هاوکاریی بەرپرسانی زەنجان ڕایگەیاند: بەرپرسانی پارێزگای زەنجان دۆخێکی گونجاویان بۆ ئەم ڕێکۆرد لێدانە ڕەخساند و تەنانەت لە کاتی گرتنی ڕێکۆردەکەشدا بەڕێوەبەری گشتیی وەرزش و لاوانی پارێزگای زەنجان و سەرۆکی لێژنەی باسکێڵ سواری پارێزگا ئامادە بوون و باشترین هۆڵی وەرزشی و ئیمکاناتیان بۆ ئامادە کردم و لە ناخی دڵەوە سپاس و دەست خۆش بوونیان دەکەم.

خاوەنی ڕێکۆردی نوێی تەک چەرخی جیهان کە پاش ساڵانێکی زۆر ئاڵای ئەمریکای کێشایە خوارەوە و ئاڵای پیرۆزی ئێرانی لە جێی دانا هەروەها لە بەرپرسانی وەرزشی ئازەربایجانی ڕۆژئاوا گلەی کرد و وتی: سەرۆکی پێشووی ئیدارەی وەرزش و لاوانی سەردەشت نەبێ، لە پارێزگادا هیچکەس بۆ ئەم ڕێکۆرد لێدانە یاریدەمی نەدا و بۆیەش گلەییم لێیان هەیە چوونکە پێم خۆش بوو ئەم ڕێکۆردە لە پارێزگای ئازەربایجانی ڕۆژئاوا لێبدرێت.

ئاوات ڕەشیدی ئاماژەی بە هەوڵی ئاستەم و تاقەتبڕی خۆی بۆ لێدانی ئەم ڕێکۆردە کرد و دەریبڕی: لە سەرماوەزی ٩٤ تا ئێستا تەمرینگەلێکی دژوارم بۆ ئەم کارە ئەنجام داوە و بڕوام بەوە هەبوو کە دەتوانم ڕێکۆردی جیهان بشکێنم. خودای گەورە یارمەتی دا و ئەم کارە ڕێکی هات.

ڕێکۆردی نەتەوەیی تەک چەرخ بە باسکێڵ بە مەودای ٢٨ کیلۆمەتر و ٧١٠ مەتر و هەروەها تێپەڕ کردنی سەردەشت تا هەڵەبجە بە درووشمی "ئاشتی بۆ هەموو مرۆڤەکان" و بە مەودای ٣٢٠ کیلۆمەتر و بۆ ماوەی ٤ ڕۆژ بە شێوەی تەک چەرخ لە کارنامەی وەرزشی ڕەشیدیدا هەیە.

ڕێکۆردگیری بۆ شکاندنی ڕێکۆردی تەک چەرخ بە باسکێڵی جیهان کاتژمێر ١٢ی ڕۆژی ٢١ی پووشپەڕ لە هۆڵی ڕاکردن و مەیدانیی مامۆستا سەمەد ئیپەکچیی زەنجان لەژێر چاوەدێری ڕێکخراوەی تۆمارکاریی ڕێکۆردە نەتەوەییەکانی وڵات و نوێنەری گینەس لە ئێران و بە هاوکاری ئیدارەی گشتیی وەرزش و لاوانی پارێزگای زەنجان ئەنجام درا.