Çaremîn Mihrîcana Tiriyê li Ûrmiyeyê wê bi ekrana belgefîlma "Ûrmiye Bajarê Navnetewî" bê lidarxistin

Çaremîn Mihrîcana Tiriyê wê li gundê Çîçestê ya Ûrmiyeyê bi ekrana belgefîlma bi navê Ûrmiye Bajarê Navnetewî dest pê bike.

Li gorî rapora Kurdpress`ê, organîzatorê Çaremîn Mihrîcana Tiriyê li Ûrmiyeyê ji rojnamevanan re ragihand: Belgefîlma bi navê Ûrmiye Bajarê Navnetewî ya bi qasî 25 xulekan wê di merasîma vekirina mihrîcanê de bê ekrankirin.

Nasir Rikab nûçeya ekrankirina belgefîlmê ragihand û wiha pê de çû: Karê çêkirina belgefîlma Ûrmiye Bajarê Navnetewî bi qasî 3 mehan dewam kir.

Herwiha Omîd Şekeryazî, derhênerê belgefîmlê jî der heqê wê de axivî û bal kişande ser girîngiya yekîtiya gelan di belgefîlmê de û wiha got: Me di belgefîlma Ûrmiye Bajarê Navnetewî de hewl da ku rola çandan pirreng be û ev bi xwe yek ji ciyawaziyên di navbera vê belgefîlmê li gel yên berî wê de ye. Me hewl daye ku ziman û cil û bergê gelerî û taybetmendiyên wan zêdetir bên ber çav.

Wî herwiha da zanîn ku ev belgefîlm bo 5 zimanên din hatiye wergerandin û got: Belgefîlm ji bo ekrana di radyo û televizyona fermî ya welêt, torên civakî û heta nedyaya navnetewî de tê amadekirin û bo zimanên îngilîzî, fransî, spanî, erebî û tirkî hatiye wergerandin û eger baş bê pêşwazîkirin, wê bo çend zimanên din jî were wergerandin.

Çaremîn Mihrîcana Tiriyê li Ûrmiyeyê wê ji 13 heta 20`ê îlonê li gundê Çîçestê ya Ûrmiyeyê bê lidarxistin.