Zêbarî: Ebûbekir Bexdadî li Mûsilê ye

SiyasetmedarêHerêma Kurdistanê dibêje li gorî agahiyan “xelîfe”yê DAIŞ`ê Ebûbekir Bexdadî li Mûsilê ye.

Endamê polîtburoya PDK`ê Hoşyar Zêbarî, ji ajansa Reutersê re behsa operasyona azadkirina Mûsilê kiriye û gotiye, di qonaxa yekemîn de hêzên Pêşmerge û Artêşa Iraqê karîn serkeftinek mezin bi dest bînin û herî kêm 9 gundên mezin ji destê DAIŞ`ê bistînin.

Zêbarî her wiha gotiye ku DAIŞ şepirze bûye çimkî dizane dê ji hemû aliyan de rastî êrişê were.

Wî siyasetmedarê kurd eşkere kiriye ku agahiyên îstixbaratî nîşan didin ku xelîfeyê DAIŞ`ê Ebûbekir Bexdadî û pisporê çêkirina bombeyan ê DAIŞ`ê Fewzî Elî li Mûsilê ne.