قوتابیانی کوردستانی پلە دووهەمی پێشبڕکێی مەلەوانی قوتابیانی ئێرانیان مسۆگەر کرد

بەپێی هەواڵی کوردپرێس سەید فوئاد حسێنی بەرپرسی فەرمانگەی پەروەردە و بارهێنانی ناحیەی یەکی سنە لە لێدوانێکدا بۆ هەواڵنێران ڕایگەیاند: هەڵبژاردەی ناحیەی یەکی سنە کە بە نوێنەرایەتی لە پارێزگای کوردستانەوە لە پێشبڕکێیەکانی مەلەوانی قوتابیانی ئێران بەشداری کردبوو پلەی دووهەمی هەڵبژاردەیی ئەو خولە لە پیشبڕکێیەکانی مسۆگەر کرد.

ناوبراو زیادشی کرد: قوتابیانی خوێندنگەکانی ناحیەی یەکی سنە وەکوو نوێنەری پارێزگای کوردستان بە وەدەست هێنانی ٥ میدالیای ڕەنگاوڕەنگ و دوو نازناوی باشترین هەڵبژاردەکانی ئێران لە سی و چوارەمین خولی پێشبڕکێی مەلەوانی قوتابیانی ئێران درەوشانەوە و بە گشتی توانییان پلەی دووهەمی ئەو پشبڕکێیانە وە دەست بێنن.

بەرێوەبەری فەرمانگەی پەروەردە و بارهێنانی ناحیەی یەکی سنە ئەوەشی خستە ڕوو: لە بەشی سەرەتاییدا، قوتابی ئارین خازە لە دوو بەشی ٥٠ مەتری ئازاد و ٥٠ مەتری پەپوولەدا توانی دوو میدالیای زێڕ و پلەی یەکەمی ئێران وەدەست بێنێت.

ناوبراو وتیشی: هەروەها دیسان لە بەشی سەرەتاییدا ئاکام تەهماسبی لە بەشی ٥٠ مەتری قورواقە و ١٠٠ مەتری قورواقە پلەی سیهەمی سەرتاسەری ئێرانی وەدەست هێنا و پارسا بەتی لە بەشی ٥٠ مەتری ئازاد پلەی سێهەمی مسۆگەر کرد.

بە وتەی ئەو بەرپرسە لە قۆناغی مامناوەندی سەرەتاییدا ئارین سەڵواتی توانی لە بەشی ٢٠٠ مەتری تێکەڵاوی تاکە کەسی و بەشی ٥٠ مەتری پەپوولە پلەی سێهەمی ئێرانی ئەو خولە لە پیشبڕکێیەکان مسۆگەر بکات.

هەروەها لە قۆناغی سەرەتاییدا قوتابیانی ئارین خازە، پارسا بەتی، ئاکام تەهماسبی و بەهیاد بەهمەنی لە مادەی چواری بەشی ٥٠ مەتری تێکەڵاوی هەڵبژاردەیی پلەی سێهەم و لە مادەی چواری ٥٠ مەتری ئازادی هەڵبژاردەیی پلەی دووهەمی ئاستی ئێرانیان وەدست هێنا.

کۆدی هەواڵنێر: 60112