Di dewsa kantonan de Sîstema Federaliya Demokratîk hat damezirandin

Hevserokên Meclîsa Damezirîner a Sîstema Federaliya Demokratîk a Rojava-Bakûrê Sûriyeyê Hediye Yûsuf û Mensur El-Selum ragihandin ew ê bibin nimûneyek ji bo çareserkirina kirîza Sûriyê.

Li gor rapora Kurdpress`ê ji zarê Rûdawê, îro pêncşemî Komîteya Amadekar a Kongreya Damezrêner a Sîstema Rêveberiya Pêşerojê ya Rojava û Bakûrê Sûriyê li bajarokê Rimêlan ê girêdayî navçeya Dêrikê civiya li ser ragihandina sîstema federasyona herêmên kurdnişîn û bakurê Sûriyê biryar da.

Di civîna Rimêlanê de derdora 200 delegeyan beşdar bûne ku ji nûnerên Kurd, Ereb, Suryanî, Aşûrî, Ermenî, Tirkmen û Çeçen ên herêmên kurdan û bakurê Sûriyê pêk tên.

Encumena Damezrêner a Sîstema Rêveberiya Rojava - Bakurê Sûriyê piştî civînê bi beşdariya hevserokên Meclîsa Damezirîner a Sîstema Federaliya Demokratîk a Rojava-Bakûrê Sûriyê Hediye Yûsuf û Mensur El-Selum û beşdariya hemû delegeyan konferanseka rojnamevanî lidar xist.

Encamname ji aliyê Hevserokê Meclîsa Damezirîner a Sîstema Federaliya Demokratîk a Rojava-Bakûrê Suriyeyê Mensur El-Selum ve hate xwendin.

Mensur El-Selum amaje kir ku mafê ti kesî nîne li dijî biryara wan a ragihandina sîstema federasyonê derbikevin û ew naxwazin ti pirsgirêk di navbera wan û hikûmeta Sûriyê de derbikeve û wiha pê de çû: Sîstema federaliya demokratîk li ser esasê hembêzkirina hemî pêkhateyên civakê, misoger dike ku Sûriyeya pêşerojê ji bo hemî sûriyeyiyan e.

Armanca Sîstema Federala Demokratîk a Rojava-Bakûrê Suriyeyê ya di asta herêmî de ew e ku li Rojhilata Navîn yekîtiya demokratîk pêk bîne û navbera hemû civakên ku li Rojhilata Navîn dijîn, di warê siyasî, civakî, aborî û çandî de yekîtiya demokratîk ava bikin û bi wê re jî sînorên netewe dewletan derbas bikin da ku jiyaneka di nava aşitî, ewlekarî û biratiyê de bê avakirin.

Mafê şêniyên hemû herêmên ku ji çeteyan têne rizgarkirin heye ku bi dildariya xwe tevlî sîstema federal bibin. Ev sîstem yekbûna xaka Suriyeyê diparêz e.”